Il-ġurija tal-Premju LUX tinkludi produtturi, distributuri, operaturi taċ-ċinema, diretturi ta' festivals u kritiċi tal-films, kif ukoll rappreżentant mill-Eurimages, il-fond ta' appoġġ kulturali tal-Kunsill tal-Ewropa.
Rappreżentant tal-film rebbieħ tas-sena ta' qabel isir membru ex officio tal-ġurija. Rappreżentant tal-Kummissjoni Ewropea/tal-programm Ewropa Kreattiva jservi bħala osservatur.
Il-President Onorarju li jippresiedi l-ġurija tal-Premju LUX tal-2022 huwa s-Sur Mike Downey, President tal-EFA.

Il-Kumitat għall-Kultura u l-Edukazzjoni tal-Parlament Ewropew japprova l-membri tal-ġurija kull sena.

Skopri aktar dwar il-proċess tal-għażla.

Mike Downey

Mike Downey

President Onorarju tal-Premju LUX – il-Premju Ċinematografiku Ewropew tal-Udjenza, President tal-European Film Academy

Member of the LUX Selection Panel in 2021, 2022

Mike Downey huwa produttur tal-films u attivist Irlandiż li fl-2000 waqqaf kumpanija ta' produzzjoni indipendenti bbażata f'Dublin u f'LondraFilm and Music Entertainment (F&ME) u, s'issa, kien involut fil-produzzjoni ta' kważi 100 film.

Matul il-karriera relattivament qasira tiegħu bħala produttur tal-films, Downey ħadem ma' Peter Greenaway, Agnieszka Holland, Julien Temple, Pawel Pawlikowski, Andrzej Jakimowski, Juraj Jakubisko, Fridrik Thor Fridriksson, Michel Franco u Stephen Daldry, kif ukoll ma' għadd kbir ta' diretturi oħra mill-Ewropa kollha, l-Amerika t'Isfel, l-Afrika u l-Indja.

Ix-xogħol ċinematografiku riċenti tiegħu kien jinkludi proġetti żviluppati ma' rumanziera famużi bħal James Ellroy, Günter Grass, Thomas (Schindler's List) Keneally, u Colm Toibin. Huwa ħadem ukoll mal-kittieb ta' Ida Rebecca Lenckiewicz, mal-fundatur u s-CEO ta' VICE Group Shane Smith, u ma' diretturi differenti, bħal Volker Schloendorff, Mohsen Makhmalbaf u Julien Temple.

Minbarra l-ħafna suċċessi li kellu fil-box office, il-produzzjonijiet ta' Downey irċevew aktar minn 250 premju mill-biċċa l-kbira tal-festivals ċinematografiċi ewlenin fosthom ta' Cannes, Berlin, Toronto, Sundance, San Sebastian, Tokjo u ħafna oħrajn.

Downey ilu kważi 20 sena membru tal-bord tal-European Film Academy u wara sitt snin bħala Viċi President, fl-2020 leħaq President. Hu jwettaq dmirijietu flimkien mal-President preċedenti Wim Wenders u l-President attwali Agnieszka Holland. Fl-2006, ġie elett fil-Kunsill tal-British Academy of Film and Television Arts (BAFTA) u fl-2008, ġie elett fil-Kumitat tal-Films tal-BAFTA. Downey huwa wkoll amministratur tal-White Ribbon Alliance, organizzazzjoni globali ewlenija li għandha l-għan li tnaqqas il-livelli ta' mortalità fit-twelid fil-pajjiżi li qed jiżviluppaw. Ħa sehem f'aktar minn 20 ġurija internazzjonali f'festivals ċinematografiċi madwar id-dinja, fosthom il-Festival taċ-Ċinema ta' Sarajevo, il-Festival Internazzjonali taċ-Ċinema ta' Rio de Janeiro, il-Festival Internazzjonali taċ-Ċinema ta' Cottbus, il-Festival Internazzjonali taċ-Ċinema ta' Varsavja, il-Festival taċ-Ċinema ta' Istanbul, il-Festival Internazzjonali taċ-Ċinema ta' Montreal, il-Festival taċ-Ċinema ta' Motovun, il-Festival Internazzjonali taċ-Ċinema ta' Sofija, il-Festival Internazzjonali taċ-Ċinema ta' Transilvanja, il-Festival Internazzjonali taċ-Ċinema ta' Krakovja u l-Festival Internazzjonali taċ-Ċinema ta' Zagreb, fejn, fl-2009, ġiet ippreżentata retrospettiva ta' xogħlu fl-F&ME. Fl-2014, ġie nnominat Produttur tad-Deċennju fil-Festival Internazzjonali taċ-Ċinema ta' Fort Lauderdale, u ngħaqad maż-żewġ produtturi preċedenti Ed Pressman u Robert Evans. Xogħlu bħala produttur ġie mfaħħar ukoll fil-Festival taċ-Ċinema ta' Praga tal-2015.

Fl-2020, l-Università fejn studja, Warwick University, ħabbret li kien se jirċievi Dottorat honoris causa, D.Litt., għax-xogħol u l-kontribut tiegħu għat-teatru u ċ-ċinema Ewropej.

Hu jaqsam ħinu bejn il-post fejn ikun qiegħed jiġbed l-aħħar film tiegħu u Notting Hill, Dublin u Istria.

Bo ALFARO DECRETON

Bo ALFARO DECRETON

27 TIMES CINEMA (il-Belġju)

Member of the LUX Selection Panel in 2022

Bo Alfaro Decreton twieldet Sóller, Spanja fl-1995 u għandha Masters fil-Litteratura Moderna Komparattiva. Ilha membru tal-kumitat tal-programmazzjoni tal-Film Fest Ghent mill-2019 u din is-sena, ikkollaborat ukoll mal-Altàntida Mallorca Film Fest bħala koordinatur. Matul is-77 edizzjoni tal-Biennale ta' Venezja, kienet membru tal-ġurija tal-Ġiornate degli Autori u l-ambaxxatur Belġjan għall-Inizjattiva 27 Times Cinema. Hija wkoll għalliema tal-etika, ikkollaborat f'diversi proġetti teatrali internazzjonali u regolarment tikteb dwar il-films għal diversi pjattaformi Belġjani.

 

Diego APARICIO

Diego APARICIO

27 TIMES CINEMA (Ċipru)

Member of the LUX Selection Panel in 2022

Imwieled fl-1993, Diego Armando Aparicio huwa l-fundatur u d-direttur artistiku ta' Queer Wave: Il-festival Ċinematografiku LGBTIQ+ ta' Ċipru. Il-festival għandu l-għan li joħloq spazju għall-films u l-artisti LGBTIQ+, u li jgħin fid-diversifikazzjoni tal-kultura taċ-ċinema lokali. Queer Wave kellu l-edizzjoni inawgurali tiegħu online f'Awwissu 2020. It-tieni edizzjoni bi preżenza fiżika, li damet 10 ijiem, saret f'Settembru 2021.

Aparicio huwa ex student tal-programm "Developing Your Film Festival" tal-Independent Cinema Office, kors intensiv mgħallem minn xi wħud mill-professjonisti tal-festivals ewlenin fid-dinja. Fl-2019, kien il-Kap tas-Sħubijiet għall-10 edizzjoni tal-Watersprite Short Film Festival. Hu kien membru uffiċjali tal-ġurija tal-Giornate degli Autori fil-Festival Internazzjonali taċ-Ċinema ta' Venezja fl-2018 u għen fil-Giornate bħala preselettur f'dawn l-aħħar tliet edizzjonijiet.

Minn Settembru 2019, ħadem bħala assistent tal-produzzjoni f'erba' koproduzzjonijiet internazzjonali, f'kollaborazzjoni ma' AMP Filmworks li hija bbażata f'Ċipru: Sous Le Ciel d'Alice (Il-Ġimgħa tal-Kritiċi ta' Cannes tal-2020), Patchwork (Festival Internazzjonali taċ-Ċinema ta' Karlovy Vary 2021), Tel Aviv – Beirut (postproduzzjoni) u Embryo Larva Butterfly(postproduzzjoni)

Għall-ħidma tiegħu fi Queer Wave, Aparicio ntgħażel bħala wieħed mill-20 finalist mid-dinja kollha għall-Commonwealth Youth Awards tal-2021, minn fost 1 000 persuna nnominati minn 43 pajjiż. Huwa wieħed mit-13-il membru tal-kumitat tal-għażla ta' din is-sena għall-Premju Lux tal-Udjenza, ippreżentat b'mod konġunt mill-Parlament Ewropew u l-European Film Academy.

Ex student tal-Imperial College London, Aparicio telaq minn karriera fil-fiżika biex isegwi l-imħabba tiegħu għaċ-ċinema. Għandu interess professjonali qawwi kemm fil-festivals taċ-ċinema kif ukoll fil-produzzjoni tal-films.

Ditte Daugbjerg Christensen

Ditte Daugbjerg Christensen

Direttur Maniġerjali u Kap tad-Distribuzzjoni ta' Øst for Paradis Cinema

Member of the LUX Selection Panel in 2018, 2019, 2021, 2022

Ditte Daugbjerg Christensen wirtet l-imħabba kbira tagħha għall-films u ċ-ċinema minn missierha. Tfulitha għexitha tara l-films fis-swali taċ-ċinema ta' missierha, u meta kienet żgħira wisq biex toqgħod attenta għall-films, kienet tfittex it-teżori żgħar u mitlufin taħt is-siġġijiet. Hi u l-familja tagħha spiss kienu jivvjaġġaw lejn il-festivals taċ-ċinema fl-Ewropa, minn Göteborg sa Cannes, hekk kif l-importazzjoni u d-distribuzzjoni tal-films saret parti akbar mill-kumpanija ta' missierha. Kemm meta kienet tifla, kif ukoll iktar tard matul l-istudji tagħha fl-arkitettura, kienet tbigħ il-biljetti u l-kafè fiċ-ċinema u kultant tiddisinja l-posters għal films li kienu se jintwerew. Ħadet ukoll sena sabbatika mill-università biex tikkoordina festival nazzjonali taċ-ċinema tal-films Franċiżi filwaqt li kienet qed taħdem fl-amministrazzjoni taċ-ċinema. Christensen irritornat biex tlesti l-università, iżda wara li ħadmet għal diversi snin bħala perit, fl-aħħar iddeċidiet li tingħaqad ma' oħtha biex jieħdu f'idejhom il-kumpanija ta' missierhom taċ-ċinema indipendenti u tad-distribuzzjoni, Øst for Paradis, li tagħha ilha Kodirettur u Kap tad-Distribuzzjoni mill-2010.

Il-ħiliet tagħha fl-arkitettura għadha ssibhom utli, peress li kienet inkarigata wkoll minn konverżjoni kbira taċ-ċinema u mill-espansjoni tiegħu f'teatru b'seba' skrins – l-akbar ċinema indipendenti fid-Danimarka.

Ana DAVID

Ana DAVID

Kuratur tal-Batalha Film Centre u membru tal-bord konsultattiv tal-Panorama tal-Berlinale

Member of the LUX Selection Panel in 2022

Ana David hija programmatur tal-films ibbażata f'Porto u f'Berlin, u riċentement inħatret kuratur għal istituzzjoni pubblika ġdida, il-Batalha Film Centre, li mistenni jiftaħ fl-2022 f'Porto. Ilha wkoll membru tal-bord konsultattiv tal-Panorama tal-Berlinale sa mill-2018. Hi kellha pożizzjonijiet ta' programmazzjoni fl-IndieLisboa, il-Berwick Film and Media Arts Festival, il-BFI London Film Festival, u l-Queer Lisboa International Film Festival, dan tal-aħħar bħala Kodirettur. Hi kellha wkoll pożizzjonijiet fil-Portugal Film – Portuguese Film Agency, fil-Lisbon Docs – International Financing and Co-production Forum u fil-Festival Scope.

Gaia FURRER

Gaia FURRER

Direttur Artistiku tal-Giornate Degli Autori

Member of the LUX Selection Panel in 2022

Imwielda fl-1975, Gaia Furrer kisbet il-lawrja tagħha fl-istorja taċ-ċinema fl-Università La Sapienza ta' Ruma. Hija kkollaborat ma' Film Italia, l-aġenzija pubblika inkarigata mill-promozzjoni taċ-ċinema Taljan barra mill-pajjiż, u kienet responsabbli mill-proġetti nazzjonali u internazzjonali. Hi pproduċiet xi ftit films qosra u film twil. Ipprogrammat ukoll ftit festivals taċ-ċinema u kienet konsulent għalihom. Sa mill-2004, ħadmet bħala Kap tal-Programmazzjoni fin-Noir in Festival. Wara li ħadmet fil-Giornate degli Autori sa mill-ewwel edizzjoni, l-ewwel bħala programmatur u mbagħad bħala Kap tal-Programmazzjoni, hi nħatret bħala d-direttur artistiku ġdid fl-2020.

Jonas HOLMBERG

Jonas HOLMBERG

Direttur Artistiku tal-Festival Internazzjonali taċ-Ċinema ta' Göteborg

Member of the LUX Selection Panel in 2022

Jonas Holmberg ilu d-Direttur Artistiku tal-Festival taċ-Ċinema ta' Göteborg mill-2014. Il-Festival taċ-Ċinema ta' Göteborg huwa l-festival ċinematografiku ewlieni fl-Iskandinavja u huwa s-sede tas-servizz ta' streaming Draken Film u l-pjattaforma tal-industrija Nordic Film Market. Holmberg għandu esperjenza fil-kritika tal-films u fl-2007 waqqaf ir-rivista tal-films FLM. Barra minn hekk, jikteb regolarment fil-gazzetta Expressen.

Christophe Leparc

Christophe Leparc

Direttur Eżekuttiv tal-Ħmistax tar-Reġisti fil-Festival Ċinematografiku ta' Cannes, u Direttur ta' Cinemed, il-Festival Ċinematografiku tal-Mediterran ta' Montpellier (Franza)

Member of the LUX Selection Panel in 2011, 2012, 2013, 2014, 2015, 2016, 2017, 2018, 2019, 2021, 2022

Christophe LEPARC ilu involut fl-organizzazzjoni u l-għażla tal-films tal-Festival Ċinematografiku ta' Cannes mill-1991. Wara li ħadem għall-Ġimgħa tal-Kritiċi, Leparc kien mill-2008 inkarigat mit-tiftix ta' diretturi ġodda għall-Ħmistax tar-Reġisti. Huwa wkoll id-Direttur ta' Cinemed, il-Festival Ċinematografiku tal-Mediterran, f'Montpellier.

"Fil-fehma tiegħi, il-Premju LUX jgħaqqad żewġ punti b'saħħithom: enfasi fuq id-dinamiżmu taċ-ċinema Ewropew u l-kapaċità li jiġi promoss madwar l-Ewropa kollha. Iżda huwa wkoll opportunità biex jiżdied l-għarfien dwar l-importanza taċ-ċinema fost il-Membri tal-Parlament. Għalhekk, jistħoqqlu jiġi żviluppat."

Alexander NANAU

Alexander NANAU

Rebbieħ tal-PREMJU LUX TAL-UDJENZA tal-2021, Produttur/Direttur tal-Films

Member of the LUX Selection Panel in 2022

Imwieled fl-1979, Alexander Nanau huwa produttur tal-films Ġermaniż-Rumen u kien innominat għall-Oscar.

Id-dokumentarju tiegħu The World According to Ion B. (2009) intwera għall-ewwel darba fil-Visions du Réel f'Nyon u ngħata l-Premju Internazzjonali Emmy fl-2010. Id-dokumentarju twil tiegħu Toto and His Sisters (2014) intwera għall-ewwel darba fil-Festival Internazzjonali taċ-Ċinema ta' San Sebastian u kien innominat għall-Oscar fl-2015. Nanau kien id-Direttur tal-Fotografija għad-dokumentarju Franċiż/Ġermaniż Nothingwood (taħt id-direzzjoni ta' Sonia Kronlund), li nġibed fl-Afganistan u ntwera għall-ewwel darba f'Cannes bħala parti mill-Ħmistax tar-Reġisti fl-2017.

L-aħħar dokumentarju twil tiegħu, Collective (2019), intwera għall-ewwel darba barra mill-kompetizzjoni fil-Festival Internazzjonali taċ-Ċinema ta' Venezja bħala parti mill-għażla uffiċjali. Intwera ukoll fil-Festival Internazzjonali taċ-Ċinema ta' Toronto fl-2019 u fit-taqsima Spotlight tal-Festival taċ-Ċinema Sundance fl-2020. Collective kien inkluż fil-klassifikazzjoni tal-aqwa 10 films tal-2020 fid-dinja kollha u sar l-ewwel film Rumen li qatt ġie nnominat għal Oscar. Rebaħ, fost ħafna premjijiet oħra, il-Premju Ċinematografiku Ewropew għall-Aqwa Dokumentarju fl-2020 u ġie nnominat għal Premju BAFTA fl-2021. Dan sar it-tieni dokumentarju fl-istorja tal-Oscars li rċieva żewġ nomini meta kien qed jikkompeti kemm fil-kategorija tal-Aqwa Film Internazzjonali, bħala konkorrent Rumen, kif ukoll fil-kategorija tal-Aqwa Dokumentarju.

Il-film rebaħ il-Premju LUX tal-Udjenza fl-2021.

Nanau jgħallem f'diversi skejjel u laboratorji ċinematografiċi internazzjonali.

Susan Newman-Baudais

Susan Newman-Baudais

Eurimages – Kunsill tal-Ewropa, Kap tal-Programm: Koproduzzjoni Eurimages/l-Irlanda

Member of the LUX Selection Panel in 2015, 2016, 2017, 2018, 2019, 2021, 2022

Eurimages huwa l-fond ta' appoġġ tal-Kunsill tal-Ewropa għall-koproduzzjoni tal-films. Bħala Kap tal-Programm għall-Koproduzzjoni, Susan Newman-Baudais hija responsabbli mill-koordinazzjoni tal-iskema ewlenija ta' appoġġ tal-fond. Gradwata fl-istudji tan-negozju fi Trinity College ta' Dublin, għandha esperjenza estensiva fis-settur televiżiv tar-Renju Unit u ħadmet bħala produttur tal-effetti speċjali f'Londra u fis-settur tal-postproduzzjoni fi Franza. Hija ngħaqdet mal-Eurimages mill-Osservatorju Awdjoviżiv Ewropew, fejn kienet riċerkatur tas-suq u analista speċjalizzata fil-finanzjament pubbliku għall-films kif ukoll koordinatur tan-Network tar-Riċerka tal-Aġenzija Ewropea tal-Films. Hija l-awtur ta' bosta studji u rapporti dwar diversi aspetti tal-industrija Ewropea tal-films.

Alessandro RAJA

Alessandro RAJA

Fundatur tal-Festival Scope (l-Ewropa/l-Italja/Franza)

Member of the LUX Selection Panel in 2022

Alessandro Raja huwa professjonist tal-films ibbażat f'Pariġi u fundatur tal-Festival Scope, li beda fl-2010.

Wara li lesta lawrja fl-istudji tan-negozju fl-Università Bocconi ta' Milan, Raja ħadem f'diversi segmenti tal-industrija tal-films, li jvarjaw minn bejgħ u akkwisti internazzjonali (f'Celluloid Dreams f'Pariġi mill-2005 sal-2009 u fl-Uffiċċju tal-Koproduzzjoni f'Pariġi fl-2004) sad-distribuzzjoni (f'Artificial Eye f'Londra mill-2000 sal-2003) u l-wirja (fl-Everyman f'Londra mill-1999 sal-2000). Mill-2008, ħadem ukoll bħala programmatur għall-Festival taċ-Ċinema ta' Sarajevo.

Eva SANGIORGI

Eva SANGIORGI

Direttur Artistiku tal-Festival Internazzjonali taċ-Ċinema ta' Vjenna

Member of the LUX Selection Panel in 2022

Eva Sangiorgi hija kittieb u programmatur ibbażata fi Vjenna.

Hija kkollaborat ma' festivals differenti fl-Amerika Latina u waqqfet El Festival Internacional de Cine UNAM fil-Belt tal-Messiku, li hija mexxiet sal-2018. Hija ħadmet ukoll fid-distribuzzjoni, il-produzzjoni u x-xandir televiżiv tal-films. Fil-Messiku, nediet u kkoordinat pubblikazzjonijiet dwar iċ-ċinema kontemporanju għan-National Autonomous University of Mexico u żammet interess f'dan il-qasam.

Bħalissa hija d-Direttur Artistiku tal-Viennale – il-Festival Internazzjonali taċ-Ċinema ta' Vjenna.

Lenka TYRPAKOVA

Lenka TYRPAKOVA

Programmatur tal-Films tal-Festival Internazzjonali taċ-Ċinema ta' Karlovy Vary

Member of the LUX Selection Panel in 2022

Lenka Tyrpáková twieldet Praga. Hija ggradwat mill-Fakultà tal-Filosofija u l-Arti f'Charles University wara li studjat il-lingwa Russa u l-lingwa Ukrena. Wara studjat l-Istudji tar-Russja u tal-Ewropa tal-Lvant fil-Fakultà tax-Xjenzi Soċjali. Fl-2005, ingħaqdet mat-tim tal-Festival Internazzjonali taċ-Ċinema ta' Karlovy Vary (KVIFF) u ilha taħdem fid-Dipartiment ta' Programmazzjoni minn dak iż-żmien. Hija membru tal-kumitat tal-għażla u programmatur inkarigat mill-kompetizzjoni East of the West, li tiffoka fuq l-ewwel u t-tieni films mill-Ewropa Ċentrali u tal-Lvant, it-Turkija, il-Greċja u l-Lvant Nofsani. Fil-KVIFF, hija involuta wkoll fl-għażla tal-proġetti għall-pjattaforma tal-industrija Eastern Promises. Mill-2008, ħadmet ukoll bħala programmatur għall-Prague Short Film Festival u diversi festivals oħra. Barra minn hekk, tfittex ukoll talenti ġodda għall-MIDPOINT Institute.

 

Fatima Djoumer

Fatima Djoumer

Osservatur

Member of the LUX Selection Panel in 2007, 2008, 2009, 2010, 2011, 2012, 2013, 2014, 2015, 2021, 2022

Fatima DJOUMER ingħaqdet mal-Europa Cinemas fl-1993 bħala Kap tar-Relazzjonijiet Internazzjonali u tal-Eventi u organizzat konferenzi tan-network, programmi ta' żvilupp tal-udjenza, laboratorji tal-innovazzjoni u t-Tikketta tal-Europa Cinemas. Europa Cinemas huwa network tas-swali taċ-ċinema li jappoġġja ċ-ċirkolazzjoni ta' films Ewropej barra mill-pajjiż ta' oriġini tagħhom u attivitajiet ta' żvilupp tal-udjenza, b'enfasi fuq iż-żieda tal-interess tal-udjenzi żgħażagħ fil-films Ewropej. In-network huma magħmul minn 1 216-il sala taċ-ċinema (bi 3 131 skrin) f'738 belt fi 43 pajjiż.

"Il-Premju LUX tal-Udjenza ġdid se jkun jista' jinvolvi u jilħaq aktar udjenzi fl-Ewropa, inkluż bl-għajnuna tas-swali taċ-ċinema Europa Cinemas fil-kontinent kollu tagħna. Aħna kburin ħafna li aħna sħab tal-Parlament Ewropew sa mill-ħolqien ta' dan il-Premju!"

Maria Silvia Gatta

Maria Silvia Gatta

Osservatur

Member of the LUX Selection Panel in 2021, 2022

Il-Kummissjoni Ewropea, Ewropa Kreattiva - Direttorat Ġenerali għan-Networks tal-Komunikazzjonijiet, il-Kontenut u t-Teknoloġija